Luke 7
Avat tai koa rovitei Siu rie lati keke demkatien koa kuri marite mok en demkatien onen Siu keil houlu a
1Navong Iesu visein meatin keil evus, kei va en taon ten out Kapaniam. 2En out enek, avat tai onen meatin keil tavaeen ten out Rom mul ien. En teim sen, slev tai koa ienvatien onen mul ien mul mesai houlu, vesesal vamat. 3Ka navong avat enek longe keke Iesu mai tuai, kei sila tei en elda keil onen Siu keil uva keke avahis Iesu vamai vasak revi slev onen. 4Sakini elda keil enek uva ven Iesu ka apeahi avit, “!Amai kalah, kikataun meatin enek eli! Veni kei vi more meatin tai koa komai vasi mevouhou mini. 5Ienvatien onen mul en Siu keil ka san kataunien houlu min komai navong memuti eim tahihiseien onomai.”6Sakini Iesu musil keil uva. Ka navong Iesu va vesesal en teim sen, avat sila tei en timue keil onen uva ka avit mesen selusien onen min Iesu avit, “Asuv, konandemkotei nahi houlu usil inau. Inau narvinvintei keke keik kovamai en teim onak. 7Ka narvinvintei mun mamai venuk. Ka munak kiselus enges, avaseini komul veah soutin, nakilea keke slev onak helonge hetahos eris. 8Hesuval navong hetamen onak mul viten tounah minau, ka inau namum usil kat ren. Ka navong inau mun naviten tounah min meatin tavaeen tai onak, kei mun mul mum musil kat rek. Inau nakilea mameng kati mahit, '!Ha!' ka kei heha. Vuo mahit, '!Amai!' ka kei hemai. Ka nakilea mameng kat slev onak mahit, '!Kumon koanek!' ka kei houmoni.”
9Navong Iesu long selusien enek onen, kei muti manin ka viles les vangi meatin keil koa amul amusili ka viteni min keil vit, “Anatin eli, en me-Isrel keil, narvotintei veah demkatien takeih vasuval koa navotini en meatin ekek.”
10Ka navong timue keil onen avat enek uva ris teim sen, alesi keke slev enek onen longe tahos tuai.
Iesu mumon natin vatina tai moul eris ran matien
11Katau en avong enek, Iesu ral min meatin keil onen amusil sise one uva ka arokol meteimal ten out Naen. Ka meatin sav keil houlu amul amusil keil. 12Navong keil uva vesesal ven voiteh ten vieh ten meteimal enek, keil ales vangi meatin keil tai koa amul avous avet tai. Teiai onen litetai tai koa mat mul ien ka uva keke avatahini. Litetai enek vi titiali tas onen vatina tai. 13Navong Asuv Iesu les vatina enek, ien mahisi ka viteni mini vit, “Konatangtei.” 14Evus, Iesu va vesesal ven keil, mutelan hen, ka rokol avet onen litetai koa mat. Sakini koakeil avousi avati keil. Evus, Iesu viteni vit, “!Litetai, naviteni minuk, kimoul eris!” 15Sakini litetai enek moul eris, mea, ka selus. Evus, Iesu viteni min mama onen vit, “Mama, natmali keie.”16Meatin vasi keil amuti manin ka avati lat isen Ahi avit, “!Kosa, provet tai koa vi hetetamen imok mul ral min ir!” Ka koakeil emun avit, “!Ahi mai tuai keke vakataun meatin keil onen!”
17Sakini, longlongien usil Iesu ka rahit out vasi en provins ten out Sudea ral min kantri vasi keil emun koa amul vesesal veni.
Sion Baptis ien vati vailea munak Iesu vi Mesaea anatin b
18Longlongien usil Iesu rokol meatin keil onen Sion Baptis, ka keil uva aselus usili mini. Sakini, Sion vise meatin onen elu lumai veni 19ka sila keilu luva keke luvahis Asuv Iesu luvahit, “?Keik kovi kei koa Ahi vit kati keke hesani hemai, vuo mehetosin etai mun?”20Navong luva ven Iesu, luvisi luvit, “Sion Baptis sila komal keke melvahisuk vamukok, '?Keik kovi kei koa Ahi vit kati vit hesani hemai, vuo mehetosin etai mun?'”
21En avong enek, Iesu mul sak revi meatin keil koa amesai ka koakeil emun along mahien en keil. Kei mul vile lat ninin tisa keil ran teisav keil. Ka koakeil mete var, sak revi keil alele ris. 22Sakini Iesu vit risi min meatin keilu onen Sion vit, “Milheha ris milhehiteni min Sion asa koa millonge ka millesi. Koakeil mete var, akilea alele eris; ka koakeil asakras avakaka, amual eris. Meatin keil koa akur mesaien ten leporsi, keil ave mai muto ris; ka koakeil ralinge vonhon, alonglong eris. Koakeil umat, amoul eris; ka more longlongien mul va min koakeil tounah one tovuol. 23Milheha milhehit meseni min Sion keke koakeil rendemien one rovitei elu usil inau ka tounah keil koa namul namumoni, tokolkatien onen Ahi hel en keil.” ▼
24Navong meatin keilu onen Sion luva, Iesu selus usil Sion min vangi meatin keil vit, “?Navong kami miva en out volvol keke mivales Sion, iemi vati keke mivales vati meatin koa kave? ?Miva keke miles kei koa rokeihtei suval sili vatiai tai koa sakras valomal navong eang muh keih? !Vuo! 25?Miva keke miles meatin koa kave? ?Meatin tai koa musin en momore eisin keil? !Vuo! Keil koa amusin mukok, moulien one vilelau en tounah houlu ka aro nges en mari eim omon asuv houlu keil. 26?Mukonek, isei varei mivaha keke mivalesi? ?Provet tai? !Anatin! Kei vi provet tai, ka naviteni min kami, kei vi houlu mok en provet savsav keil. 27Sion vi kei koa amutis usili en Tus Votut avit,
'Kilesi. Inau nisila eiloheh onak helamu enuk.
Kei heha mau keke vasak mesen sise ten amaien onom.'(Mal 3:1)
28“Koanek anatin, meatin sav tovuol koa avahasi en out netan koa vahi houlu mok valin Sion. Ka meatin kuren tai koa maen Ahi vahi asuv houlu onen ka romottei en demkatien onen vi houlu mok mulin Sion.”
29Meatin kuren keil suval meatin keil ten takis akilea en anatinien ten selusien onen Iesu. Veni keil along kilea more sise onen Ahi koa Sion visein keil eni ka amaen Sion vi baptaes en keil. 30Ka Farasi keil ka Tiser keil ten Mengkatien keil onen Mosis asesein asa koa Ahi ien vati voumoni en moulien one veni armaentei Sion vahi baptaes en keil.
31Iesu viteni mun vit, “?Meatin keil ten kosa, asuval asa? ?Sakien one suval asa? 32Keil asuval titiali keil koa arondan en out tahulhulien. Ka tei en keil amul avisohiso va min titiali sav keil avit,
'Komai memul memusau en sien. ?Vensa varei kami mirvoltei?
Komai mumul memurang. ?Ka vensa kami mirmuaitei?'
33Naviteni mukok veni kami, hetetamen keil onen Siu keil, misel kutut kat inau ka Sion emun veni melromusiltei sakien keil onami. Veni navong Sion Baptis emai, kei mul val ran anien keke vahis ka romuntei uaen, ka kami misel kutut kati mivit, '!Sion, ninin tisa mul ien!' 34Ka evus, navong inau, Natin Meatin, numai, nakanian ka namun uaen. Ka kami misel kutut kat inau mivit, '!Ales meatin ekek! Kei vi meatin taanianien ka meatin tamunmunien. Ka mul vise meatin keil ten takis ka meatin tatisa keil emun en tunali keil.' 35Ka avaseini, inau naviteni min kami keke koakeil avi titiali keil onen Ahi alei kilea en meteisauen onen, ka moulien one mul rie lat anatinien teni.”
Ahin tai ten sise kas alen Iesu en senta
36Evus, Farasi tai vis Iesu va vanian vatal mini, isen Saemon. Sakini Iesu va en teim sen ka rondan en avet taanian ien. 37En out sav tai en taon, ahin tai ten sise longe keke Iesu mai kanian en teim sen Farasi enek. Sakini, kur vei senta koa mane teni keih ka va neim en eim enek. 38Navong va neim, ahin enek mai mulomal katau en Iesu. Kei mul mis ka simeten mul mue vita kas alen Iesu, sakini mul motein alen keilu en hilin. Navong alen keilu lumuto, mus keilu ka kas keilu en senta. 39Navong Farasi koa sisil en Iesu lesi, kei vit sasen eni vit, “Munak meatin enek vi provet anatin, kei heilea keke ahin enek vi isei ka vi vati ahin koa mukave. !Kei heilea keke vi ahin tai ten sise!”40Sakini, Iesu viteni min Farasi enek vit, “Saemon, nihiten tounah tai minuk.”
Saemon vit kesi vit, “Tahos tiser. Kihiteni minau.”
41Evus, Iesu viten tatavolien tai mini vit, “En avong tai, lumali elu lukur mane ran hetamen tai. Tai kur mane vi handred taosen elim (500,000), ka tamun kur mane vi taosen koa vi hanumau elu ka halualim emun (50,000). ▼ 42Katau eni, lumali keilu enek lusakras luvasa kes mane enek. Navong hetamen enek longe, ien mahis keilu ka viteni min keilu keke kei ien hevobongen kaon onealu. ?Sakini Saemon navisuk, isei en lumali enek keke ienvatien onen hel en hetamen enek heli?”
43Saemon vit kesi mini vit, “Namundemi navit vahesa kei koa kaon onen mariso mok, ka hetamen ien vobongeni varei.”
Navong Iesu longe mukok viteni mini vit, “Koviteni mal.” 44Evus, Iesu viles ka les ahin enek ka viteni min Saemon vit, “?Koles ahin enek? Navong numai teim som, korsantei oai minau makas alok eni. Ka ahin enek, kei kas alok en simeten ka mul moteini en hilin. 45Keik kormustei vivik keke kovakur revi nau mamai teim som. Ka ahin enek, avong kati koa mai neim, kei mus alok ka romusehtei eni. 46Keik korsan etai li oel minau keke makas veinak eni vasak mesenau maanian. Ka kei kas alok tanetan en senta tetahos. 47Sakini naviten koanek minuk: mari kaon ten tisaen keil onen ahin enek, narmundemtei mun usili ka methos onak mul en kei. Sakini, ienvatien koa kei rie lati minau marite mok. Ka kei koa kaon ten tisaen vi havivis, avaseini methos onak mul ien, ienvatien koa meatin enek rie lati minau vi havivis. Ka koanek suval keik Saemon.”
48Evus, Iesu viles ka viteni min ahin enek vit, “Kosa, methos onak mul enuk tuai ka nirmundemtei mun usil tisaen keil onom.”
49Navong meatin sav keil koa akanian ruai ral mini alonge mukok, aviteni min keil eris avit, “?Kei mundemi vit vi vati meatin sa varei koa kilea voumon methos ven tisaen onen meatin keil?”
50Ka Iesu viteni min ahin enek vit, “Ven demkatien onom minau, Ahi mutut moulien onom. Kiha hetal min tomat onen Ahi.”
Copyright information for
PMA